“වවුල්පනේ භූගත හිරිගල් ගුහාව“ යනුවෙන් පසිඳු මේ ලෙනට එම නම ලැබී ඇත්තේ, ඈත අතීතයේ සිට ම මෙය කිරි වවුල් පාරාදීසයක්ව පවතින නිසාවෙනි. ප්රධාන උමං දොර තුළින් ලෙන තුළට පිවිසෙන විට, මුලින් ම දැනෙනුයේ ඉසිලිය නොහැකි ‘වවුල් ගඳකි‘. දස ලක්ෂ සංඛ්යාත කිරි වවුලන්ගේ ප්රධානතම නිවහන වන ලෙන, නිරතුරුවම අන්ධකාරයෙහි නිමග්නව පවතී. උන්ගේ නොකන්කළු හඬ එක ම කන්කරච්චලයක් වැන්න.මෙහි දිග මීටර් 52 ක් පමණ වේ. මේ ලෙන වඩා හොඳින් බලාකියා ගැනීමට, විදුලි පන්දමක් ඇවැසි ය. එමෙන් ම, නිතිපතා පොද වැස්සක් මෙන් පතිත වන වවුල් බෙටිවලින් බේරීම සඳහා, කුඩයක් වැනි කිසියම් ආවරණයක් ද අවශ්ය වේ. එපමණක් ද නොව, වවුල් පැටවුන්ගේ මසට වහවැටී සිටින යම් යම් විසකුරු සර්පයන් ද මෙහි ගැවසෙන බව කල්පනාවට ගත යුතුව ඇත.